ek muddat se yahan thahra hua paani hai
dasht-e-tanhai hai aur aankh men virani hai
dekho khamosh si jhilon ke kinare ab bhi
sog men lipte darakhton ki faravani hai
aaina dekhne ki taab kahan thi mujh men
saaf likkhi thi jo chehre pe pashemani hai
dasht-e-vahshat men charaghon ko jalaun kaise
in charaghon se havaon ko pareshani hai
saya-e-abr-e-tavajjoh ki khabar kya hoti
zindagi main ne to sahraon se pahchani hai
apne maazi ko mujhe dafn bhi khud karna hai
ye qayamat bhi dil-o-jan pe abhi dhani hai
ab ke chamka hai sitara jo ‘farah’ bakht ka hai
tire atraf usi ki hai jo tabani hai
Leave a Reply