har koi turra-e-pechak pahan kar nikla
ek main pairahan-e-khak pahan kar nikla
aur phir sab ne ye dekha ki isi maqtal se
mera qatil miri poshak pahan kar nikla
ek banda tha ki odhe tha khudai saari
ik sitara tha ki aflak pahan kar nikla
aisi nafrat thi ki is shahr ko jab aag lagi
har bagula khas-o-khashak pahan kar nikla
tarkash o daam abas le ke chala hai sayyad
jo bhi nakhchir hai fitrak pahan kar nikla
us ke qamat se use jaan gae log ‘faraz’
jo labada bhi vo chalak pahan kar nikla
Leave a Reply