apni nazar se TuuT kar apni nazar men gum hua
vo baḌa ba-shu.ur tha apne hi ghar men gum hua
marg-zada the rang sab aa.ine pusht-e-chashm the
ik vahi dard-mand tha ḳhauf-o-ḳhatar men gum hua
raste a.ine bane paanv tamam rang the
is pe bhi ye saval vo kaise safar men gum hua
soch havas men na thi aankh hudud men na thi
peḌ hava men uḌ ga.e saanp khanDar men gum hua
har ḳhabar us se thi ḳhabar aur vo be-panah tha
harf-zada hua to phir ek ḳhabar men gum hua
mauj-e-shafaq sarab thi marg-e-nazar ḳhayal tha
da.era aab par raha nuqta bhanvar men gum hua
mujh men the jitne aib vo mere qalam ne likh diye
mujh men tha jitna husn vo mere hunar men gum hua
Leave a Reply