Hajra Noor Zaryab
ashk ko aankh ki dahliz pe laaya na karo
dil ke halat zamane ko bataya na karo
apni ankhon men hasin ḳhvab sajaya na karo
pyaar ka taj-mahal dil ko banaya na karo
ḳhusbu-e-ishq bhi hai itr ki ḳhushbu jaisi
saḳht dushvar hai ai yaar chhupaya na karo
ḳhud hi sanpon ko bula lete ho apne ghar men
peḌ chandan ke tum angan men lagaya na karo
rab to hai shafi-e-mutlaq hai shifa-baḳhsh vahi
sar dar-e-ghair pe tum apna jhukaya na karo
ḳhvab ke jitne gharaunde hain bikhar ja.enge
apni palkon pe ka.i ḳhvab sajaya na karo
sang-dil jo bhi hain un ko na basao dil men
shish-mahlon men kabhi sang lagaya na karo
bunda-bandi bhi muqaddar men nahin hai ‘zaryab’
apne angan men na.e peḌ lagaya na karo
Leave a Reply