taḌap ke haal sunaya to aankh bhar aa.i
jo us ne zaḳhm dikhaya to aankh bhar aa.i
thi jis charagh se qaa.em miri umid-e-sahar
hava ne us ko bujhaya to aankh bhar aa.i
zamane-bhar ka sitam sah ke muskurata raha
fareb apnon se khaya to aankh bhar aa.i
hamare shahr ki galiyon men qahr Dhate hue
lahu ka sail dar aaya to aankh bhar aa.i
saba ne aah ḳhizaon ke saath mil kar phir
gulon ka rang uḌaya to aankh bhar aa.i
jabin-e-hal pe maazi ki talḳh yadon ne
sunahra naqsh banaya to aankh bhar aa.i
tamam umr to apnon ki Thokaron men rahe
kisi ne sar pe biThaya to aankh bhar aa.i
bichhaḌte vaqt kisi ne jo pyaar se ‘shamsi’
machal ke haath hilaya to aankh bhar aa.i
Leave a Reply