husn jo rang ḳhizan men hai vo pahchan gaya
fasl-e-gul ja mire dil se tira arman gaya
tu ḳhudavand-e-mohabbat hai main pahchan gaya
dil sa ziddi tiri nazron ka kaha maan gaya
a.ina-ḳhana se hota hua hairan gaya
ḳhud-faramosh hua jo tumhen pahchan gaya
ab to mai-ḳhana-e-ulfat men chala aaya huun
us se kya bahs raha ya mera iman gaya
apne dil se bhi chhupane ki thi koshish kya kya
vo mira hal-e-mohabbat jise tu jaan gaya
hai yahi hukm to ta.amil karenge sahab
na karenge tumhen ham yaad jo dil maan gaya
chhin gaya kaif bahakte hue kam-zarfon men
mai-kade se bhi gaya main to pareshan gaya
na mila chain kisi haal men majburon ko
muskura.e to har ik shaḳhs bura maan gaya
apni rau men jo baha.e liye jaata tha hamen
vo zamana vo tamannaon ka tufan gaya
jhuk ke chumi jo zamin us ki gali ki ham ne
kufr chiḳha ki sambhalo mira iman gaya
tiliyan ḳhuun se tar dekhin qafas ki jo ‘saba’
apni sukhi hui ankhon pe mira dhyan gaya
Leave a Reply