Mera KHwab-E-Tamanna Saat-E-Bedar Jaisa Hai

mira ḳhvab-e-tamanna sa.at-e-bedar jaisa hai

magar ik ik nafas chalti hui talvar jaisa hai

nazar apni navah-e-rang se aage nahin baḌhti

pas-e-manzar yaqinan saya-e-divar jaisa hai

dil-azari miri fitrat men shamil hai na aadat men

tumhen ma.alum hi hoga mira kirdar jaisa hai

tamanna.i to hain lekin koi aage nahin baḌhta

miri shohrat ka hangama faraz-e-dar jaisa hai

samundar aadmi ka kha gaya kitne safine ko

yahan jo shahr hai vo dosto manjdhar jaisa hai

ye duniya milkiyat apni na virsa hai buzurgon ka

yahan jo aadmi hai vo kira.e-dar jaisa hai

talavvun ke siva kuchh bhi nahin milta manazir men

kisi mausam se miliye vo mizaj-e-yar jaisa hai

ye kyunkar munfarid hota hai ye uslub-e-ghazal tera

zamin ke rang jaisa chand ke ruḳhsar jaisa hai

milo jis se bhi vo sud-o-ziyan ki guftugu chheḌe

hamare ahd men rishta bhi karobar jaisa hai

hazaron kaam hon paḌhiye magar column zarurat ka

mire bachche ka chehra sub.h ke aḳhbar jaisa hai

mubarak ‘ramz’ tujh ko ḳhusrav-e-mulk-e-suḳhan hona

hatheli men jo chhala hai vahi dinar jaisa hai