Usha Bhadoriya
ham kabhi ḳhud se koi baat nahin kar paate
zindagi tujh se mulaqat nahin kar paate
baiTh jaata hai jahan dard thaka-hara sa
ḳhvab bhi us se savalat nahin kar paate
un se phir aur kisi shai ki tavaqqo kaisi
chand lamhe bhi jo ḳhairat nahin kar paate
zindagi be-sar-o-saman hi guzar jaati hai
din jo kar lete hain vo raat nahin kar paate
umr-bhar un ke muqaddar men hain sukhe dariya
apni koshish se jo barsat nahin kar paate
sabr ki baat baḌi shukr ke dariya gahre
lekin un se guzar auqat nahin kar paate
kabhi bhule se muqaddar jo hamen deta hai
suraḳh-ru ham vahi lamhat nahin kar paate
ik na ik ḳhauf hamen rok liya karta hai
ham bayan Dubte jazbat nahin kar paate
paas aate hain jahan apne irade ‘usha’
ham kabhi un ki mudarat nahin kar paate
Leave a Reply