kisi ne chehre pe bikhra liya tha zulfon ko
zara si baat thi bas le uḌe hain divane
ye phuul khilte hain gulzar men ki parde se
baḌha ke haath koi de raha hai paimane
hui hai ba.is-e-tughyan-e-ishq garmi-e-husn
jale na sham.a to kyuun ghir ke aa.en parvane
jahan jin se tha ik bazm na-o-nosh tamam
kahan vo bada-gusar ab kahan vo maiḳhane
jo aql vaale hain chalte hain apni apni raah
sab ik ravish pe chale ja rahe hain divane
nahin hai farq koi nuur aur zulmat men
havas gum hain vo palTa liya hai duniya ne
chamak uThen to mah-o-mahr ko bhi kar den maand
vo zarre god men apni liye hain virane
kisi ke tiir lage siine men ḳhuda na kare
hamare dil men hai kya dard koi kya jaane
hamare vaste saaqi piyala-o-ḳhum ek
chhalak chalen jo vo hote hain aur paimane
ḳhuda samajhne se aḳhir bacha liya mujh ko
hazar shukr mire aib tum ne pahchane
hai dil men aag to ankhon men lala-zar ‘jigar’
nigah-e-naz ke andaz koi kya jaane
Leave a Reply