itna tilism yaad ke chaqmaq men raha
raushan charagh duur kisi taaq men raha
maḳhfi bhi tha visal ka vo bab-e-muḳhtasar
kuchh dil bhi mahv hijr ke asbaq men raha
sahra ke ishtirak pe raazi the sab fariq
mahmil ka jo fasad tha ushshaq men raha
mafqud ho gaya hai siyaq-o-sabaq se
jo harf-e-umr saikaḌon auraq men raha
main tha ki jis ke vaste paband ahd-e-hijr
vo aur ek hijr ke misaq men raha
atvar us ke dekh ke aata nahin yaqin
insan suna gaya hai ki afaq men raha
ḳhufta the daa.en baa.en ka.i mar-e-astin
zahrab ka asar mire tiryaq men raha
tariḳh ne pasand kiya bhi kisi sabab
ya bas ki shah-e-vaqt tha auraq men raha
Leave a Reply