Meena Khan
kya bata.un kaisi thi dil ki kaifiyat meri
us ne muskura kar jab puchhi zaujiyat meri
puchhta hai jab mujh se vo salahiyat meri
kis qadar taḌapti hai phir ye ahliyat meri
yuun mujhe basa.e ho dil men ek muddat se
kaash tum bata sakte sab ko shahriyat meri
duur tum se jaane ka ik ye fa.eda hoga
kuchh samajh to aa.egi tum ko ahmiyat meri
ye bhi ḳhush-nasibi hai jo ki likkhi jaati hai
varison ke khane men ab bhi valdiyat meri
ghair ka hai tu lekin phir bhi mutma.in huun main
kuchh hasin lamhe hain kyunki milkiyat meri
naam sab ka ginti huun dosto ke main apne
jab bhi puchh leta hai koi haisiyat meri
jaan is pe deti huun mulk hai ye mera bhi
phir bhi puchhte ho tum mujh se qaumiyat meri
Leave a Reply