paas men rah ke nigahon se bacha.e rakhna
apne dukh-dard ko apnon se chhupa.e rakhna
ham guḌa-bhag ghaTa-joḌ nahin kar paate
apni aadat men hai rishton ko nibha.e rakhna
ḳhud ko ḳhud se hi chhupane ka tariqa hai ye
apni baton men sada ḳhud ko laga.e rakhna
pyaas jab haath uTha.e to na ḳhali jaa.e
badalo itni to ummid jaga.e rakhna
andhiyon se kabhi bujhti nahin ummid ki lau
yuun hi ehsas ke dipak ko jala.e rakhna
kuchh bhale log kahani ki tarah milte hain
dukh kisi ka bhi ho kandhe pe uTha.e rakhna
Leave a Reply