tum mire paas raho jism ki garmi baḳhsho
sard hai raat bahut ghar se na bahar niklo
dudhiya chandni bistar pe kahan se aa.i
phir koi chand na nikla ho gali men dekho
sar pe kab kaun kahan sang-e-malamat maare
parsaon se pare kalba-e-ahzan men raho
koi bhonra na kahin phuul ka ras pi jaa.e
apni mad.hosh nigahon ke dariche kholo
jaane kis manzil-e-be-nam ki janib niklun
apni tanha.i se Darta huun mire saath raho
barf ik roz pahaḌon ki pighal ja.egi
sard-mehri-e-zamana ki shikayat na karo
kitni biiti hui sadiyon ki kahani huun ‘shamim’
mere chehre ki ye bigḌi hui tahrir paḌho
Leave a Reply