chala ankhon se jab kashti men vo mahbub jaata hai
kabhi ankhen bhar aati hain kabhi ji duub jaata hai
kaho kyunkar na phir hovega dil raushan zulekha ka
jahan yusuf sa nur-e-dida-e-yaqub jaata hai
jahan ke khub-ru mujh se churaen kyuun na phir ankhen
jo koi khurshid ko dekhe so vo mahjub jaata hai
mira aansu bhi qasid ki tarah ik dam nahin rukta
kisi betab ka goya liye maktub jaata hai
‘yaqin’ hargiz kiya mat kar iti tarif ladkon ki
isi baton sati mazmun sa mahbub jaata hai
Leave a Reply