mujhe aish o ishrat ki qudrat nahin hai
karun tark-e-duniya to himmat nahin hai
kabhi gham se mujh ko faraghat nahin hai
kabhi aah o naale se fursat nahin hai
safon ki safen ashiqon ki ulat den
qayamat hai ye koi qamat nahin hai
barasta hai menh main tarasta huun mai ko
ghazab hai ye baran-e-rahmat nahin hai
mire sar pe zalim na laaya ho jis ko
koi aisi duniya men aafat nahin hai
hai milna mira fakhr aalam ko lekin
tire paas kuchh meri hurmat nahin hai
main gor-e-ghariban pe ja kar jo dekha
ba-juz naqsh-e-pa lauh-e-turbat nahin hai
buri hi tarah mujh se ruthi hain mizhgan
unhen kuchh bhi chashm-e-muravvat nahin hai
tu karta hai iblis ke kaam zahid
tire fel par kyunke lanat nahin hai
main dil khol ‘taban’ kahan ja ke rouun
ki donon jahan men faraghat nahin hai
Leave a Reply