Poet
chashm-e-junun men husn-e-salasil hai be-qarar
kis ki gali men jashn-e-gareban mana.en ham
shayad kisi ka haath baḌhe ban ke mudda.i
ilzam ki talash men daman saja.en ham
rauzan banega dida-e-yaqub ek din
apne liye ḳhud aap hi zindan bana.en ham
chhupne lagi hai ziist andheron ki god men
aao to phir charagh-e-havadis jala.en ham
shahr-e-tarab men milte hain apne bhi naqsh-e-pa
aa.e na gar yaqin to aao dikha.en ham
jalve hi Das rahe hain shu.ur-e-jamal ko
kis ko hadis-e-vadi-e-aiman suna.en ham
dasht-e-talab ke ḳhaar bhi dil men chubhoiye
phir kaise lab pe harf-e-taqaza na laa.en ham
uryan kiya salib ne ham ko bhi apne saath
socha tha asman-e-chaharum pe jaa.en ham
phir garm ret uḌ ke chali bastiyon ki samt
mahmil-nashin ko DhunDh ke sahra men laa.en ham
zahrab ban chuka hai ye ehsas-e-agahi
ab kis ko baḳht dard ka darman bana.en ham
Leave a Reply