Gul-Pairahan Rahe Ki Darida-Qaba Rahe

Jameel Malik

gul-pairahan rahe ki darida-qaba rahe

jis haal men rahe tira naqsh-e-baqa rahe

ham to tamam umr tiri hi ada rahe

ye kya hua ki phir bhi hamin bevafa rahe

chahi jo tu ne baat vahi baat ham ne ki

teri zaban bane tire dil ki sada rahe

tu saath saath tha to ḳhuda.i bhi saath thi

apni rafaqaton ke nishan ja-ba-ja rahe

tujh ko bhula ke bhi na tujhe ham bhala sake

na-ashna vo the ki jahan ashna rahe

sab dekhte the phir bhi koi dekhta na tha

sab ke liye rasa the magar na-rasa rahe

lab par ho shikva-rez tabassum bujha hua

dil men magar kisi ki mohabbat siva rahe

tasvir ki tarah tiri surat ho ru-ba-ru

tasvir ban ke koi tujhe dekhta rahe

dil tang ho to vus.at-e-alam bhi tang-tar

duniya bahut khuli hai agar dil men ja rahe

lagte hi aankh raat ke hangame so ga.e

jaage the jitni der qayamat bapa rahe

phulon ne ja ke sej saja.i tamam raat

kanTe chaman ke sab mire daman men aa rahe

ye jashn-e-na-ḳhuda hai ki maujon ka raqs hai

kashti ho gharq-e-ab magar na-ḳhuda rahe

kahne ko ek lafz mire paas hai ‘jamil’

jab le uḌe vo baat mire paas kya rahe