hain kaise kaise marahil guhar se aage bhi
ghazal kuchh aur hai kar-e-hunar se aage bhi
ye sho.abde ka tajassus na ḳhatm hoga kabhi
jahan hoga jahan-e-digar se aage bhi
bhare julus men goli se maara ja.unga
main sochta huun ḳhuda-e-bashar se aage bhi
ye ird-gard ke manzar mire shanasa hain
guzar hua hai isi rahguzar se aage bhi
vara-e-chashm manazir ki khoj jaari rakh
nazar baḌha zara hadd-e-nazar se aage bhi
ik aur jism hai meri nazar men tujh sa hi
ik aur rang hai rang-e-sahar se aage bhi
aziyyaten hain moharram ke ba.ad bhi kitni
safar mazid hain mah-e-safar se aage bhi
para.i aankh ki putli sahara kya deti
vahan ik aur bhanvar tha bhanvar se aage bhi
khule hain raaz ka.i mere qatl ke mujh par
paḌhi hai main ne kahani ḳhabar se aage bhi
Leave a Reply