Salahuddin Nayyar
dard nisbatan kam hai aaj dil ke chhalon men
phir bhaTak na ja.un main sub.h ke ujalon men
zindagi ki rahon men yuun na chhoḌiye tanha
ham bhi hain zamane se saath chalne valon men
mustaqil ḳhamoshi ka kuchh to hal nikal aata
ham agar na kho jaate vaqt ke savalon men
aaj un ki zulfon ki aur baḌh ga.i qimat
raat bhi muqayyad hai uljhe uljhe balon men
maut aur mushkil ho zindagi ke maron ki
ḳhun-e-dil mila diije zahr ke piyalon men
main to kuchh nahin kahta ḳhud mulahiza kiije
kis ka naam chalta hai aaj ḳhush-jamalon men
narm narm lab hain ya pankhuḌi kanval ki hai
band hai shafaq un ke phuul jaise galon men
vo charagh kal shab ko bujh gaya sar-e-mahfil
jis ko DhunDte ho tum aaj ke ujalon men
laakh mujh ko vo bhulen phir bhi hai yaqin ‘nayyar’
munfarid rahunga main yaad karne valon men
Leave a Reply