Qatil-E-Alam Se Kya Yarana Hai

qatil-e-alam se kya yarana hai

dil charagh-e-gor ka parvana hai

har makan men jalva-e-janana hai

ashiqon ka har jagah afsana hai

chhin lega bahr-e-zulf-e-ambarin

ye dil-e-sad-chak rashk-e-shana hai

log kahte hain jise pir-e-mughan

yaar ka kya jalva-e-mastana hai

halqa-e-ada men hai vo sim-bar

ganj hai jis ja vahan virana hai

jis jagah chalte the kal jam-e-sharab

aaj vaan ulta hua paimana hai

baiat-e-dast-e-subu se ye khula

sab se behtar mashrab-e-rindana hai

kyuun na phanse daulat-e-duniya hamen

hai vahan par daam jis ja daana hai

mard-e-akhir-bin ke aage munimon

kasrat-e-hasti bhi ik virana hai

kaam kya hai us ko mulk-o-mal se

paas jis ke himmat-e-mardana hai

hijr men ashk-e-musalsal zahida

ashiqon ka subha-e-sad-dana hai

‘muntahi’ zer-e-qadam us yaar ke

sar katana sajda-e-shukrana hai