yuun ganvata hai koi jan-e-aziz
zindagi hoti to ham rakhte aziiz
kya bata.en ab bikhar jaane ke ba.ad
ashiyan tha ya hamen tinke aziiz
DhunDhta hai aaj kunj-e-afiyat
dil kabhi jis ko the hangame aziiz
husn tha us shahr ka avargi
aur hamen the paanv ke chhale aziiz
ye na qissa hai na andaz-e-bayan
ye mira ahval hai yar-e-aziz
ghar men ji lagta nahin aur shahr ke
raste lagte nahin apne aziiz
is tarah kya ai ghubar-e-dil koi
raqs karta hai sar-e-ku-e-aziz
saa.e hain jitne gurezan dhuup se
dhuup ko hain utne hi saa.e aziiz
ya ta.alluq kuchh na tha ya aap ko
gham hamare ho ga.e itne aziiz
samne aate nahin aur ḳhvab men
munh chhupa lete hain duzdan-e-aziz
aankh hai ya sair-gah-e-roz-o-shab
vaqt hai ya jada-e-umr-e-aziz
kya ajab jo dard-o-gham ruḳhsat hue
vo bhi the aḳhir ‘rasa’ apne aziiz
Leave a Reply