Farhat Ehsas
kabhi ḳhuda kabhi insan rok leta hai
main jab bhi jaata huun darban rok leta hai
baghair chaak kiye ghar se main agar niklun
to mujh ko mera gareban rok leta hai
main jab bhi jism se izn-e-vida.a mangta huun
vo kah ke mujh ko miri jaan rok leta hai
bas ek jast men duniya ke paar utar ja.un
magar mujhe mera saman rok leta hai
bahana chahiye mujh ko bhi koi rukne ka
so vo ba-hila-e-asan rok leta hai
main apne kufr se sharminda huun ki us ki taraf
mire qadam mira iman rok leta hai
farar ho ga.i hoti kabhi ki ruuh miri
bas ek jism ka ehsan rok leta hai
kabhi to a.enge ‘ehsas-ji’ ki bai.at men
hamen yahi bas ik imkan rok leta hai
Leave a Reply