faani kahan hai hasti-e-fani ka shor bhi
shamil hai is men naql-e-makani ka shor bhi
hassas huun aur is pe vo shiddat ki pyaas hai
sunta huun ab sarab men paani ka shor bhi
aisa sukut tha ki suna.i diya mujhe
harf-e-tahi men mauj-e-ma.ani ka shor bhi
be-barg-o-bar peḌ se rahte hain duur duur
rah-gir bhi hava-e-ḳhizani ka shor bhi
ḳhakistar-e-badan men sulagti hai koi chiiz
bujhta nahin abhi ye javani ka shor bhi
teri ghazal paḌhi to ye jaana ‘rafiq’-raz
paani ke shor men hai ravani ka shor bhi
Leave a Reply