kaman hua hai qad abru ke gosha-giron ka
tabahe haal tiri zulf ke asiron ka
dhale hai jis pe dil tis ka kiya hai zahir ism
vahi hai vo ki jo marjaa hai in zamiron ka
har ek sabz hai hindostan ka maashuq
baja hai naam ki balam rakha hai khiron ka
murid piit ke kyuun naara-zan na hon un ka
bura hai haal ki laaga hai zakhm piron ka
birah ki raah men jo kui gira so phir na utha
qadam phira nahin yaan aa ke dast-giron ka
vo aur shakl hai karti hai dil ko jo taskhir
abas hai shaikh tira naqsh ye lakiron ka
saili men juun ki latakka ho ‘abru’ yuun dil
sajan ki zulf men latka liya faqiron ka
Leave a Reply