vaqt par aate hain na jaate hain
roz iqrar bhuul jaate hain
vo jo be-vajh muskurate hain
saikdon vahm dil men aate hain
ashk-e-hasrat nikal ke daman men
jaan se haath dhoe aate hain
jab tum aate nahin ho vaade par
malak-ul-maut ko bulate hain
so gaya bakht jab se ro ro kar
saare ham-sayon ko jagate hain
un ko sharm-o-haya nahin aati
dil chura kar nazar churate hain
be-khata hai vo asman mujrim
is ko ilzam kyuun lagate hain
jaan kar ban gae hain ham bhole
chutkiyon men kise udate hain
tere kuche men ham bhi ab thak kar
dil ke manind baithe jaate hain
ghair kya aur us ki hasti kya
aap kyuun muft khauf khate hain
koi taaza sitam kiya ijad
dekh kar vo jo muskurate hain
aag paani men kyuun lagate ho
nek jo log hain bujhate hain
tum mire dil men ho to dekhun main
huur o ghilman kahin samate hain
main ne puchhi jo vajh-e-qatl kaha
thahro dam le ke ham batate hain
ishq tere tufail duniya ke
tanzen sunte hain taane khate hain
be-sabab kya bigadne ka baais
aap ‘parvin’ ko bhi banate hain
Leave a Reply