Poet
kyuun qatl ke arman men azar uTha.en
gardan miri hazir hai vo talvar uTha.en
roke se miri tab-e-ravan ruk na sakegi
raste men mire laakh vo divar uTha.en
jo dil men tumhare hai bata kyuun nahin dete
sadma jo uThana hai to yakbar uTha.en
kyuun log hain ḳhamosh zabun-hal pe apne
avaz sar-e-kucha-o-bazar uTha.en
ḳhud hi jo pas-e-parda-e-asrar chhupe hain
vo kaise bhala parda-e-asrar uTha.en
nilam jo karte hain yahan jins-e-vafa ko
mumkin hi nahin naz-e-ḳharidar uTha.en
ye jurm-e-mohabbat nahin vaa.iz ka muqaddar
ye bar-e-gunah ham se gunahgar uTha.en
phirte hain jo azad unhen kaise ḳhabar ho
zindan men jo taklif-e-giraftar uTha.en
‘shahid’ yahi likkha hai muqaddar men hamare
sadmat zamane men lagatar uTha.en
Leave a Reply