gulzar

Kitaben

kitaben jhankti hain band almari ke shishon se

badi hasrat se takti hain

mahinon ab mulaqaten nahin hotin

jo shamen un ki sohbat men kata karti thin, ab aksar

guzar jaati hain computer ke pardon par

badi bechain rahti hain kitaben

unhen ab niind men chalne ki aadat ho gai hai

badi hasrat se takti hain

jo qadren vo sunati thiin

ki jin ke cell kabhi marte nahin the

vo qadren ab nazar aati nahin ghar men

jo rishte vo sunati thiin

vo saare udhde udhde hain

koi safha palatta huun to ik siski nikalti hai

kai lafzon ke maani gir pade hain

bina patton ke sukhe tunD lagte hain vo sab alfaz

jin par ab koi maani nahin ugte

bahut si istelahen hain

jo mitti ke sakoron ki tarah bikhri padi hain

gilason ne unhen matruk kar Daala

zaban par zaiqa aata tha jo safhe palatne ka

ab ungli click karne se bas ik

jhapki guzarti hai

bahut kuchh tah-ba-tah khulta chala jaata hai parde par

kitabon se jo zaati rabta tha kat gaya hai

kabhi siine pe rakh ke let jaate the

kabhi godi men lete the

kabhi ghutnon ko apne rehl ki surat bana kar

niim sajde men padha karte the chhute the jabin se

vo saara ilm to milta rahega ainda bhi

magar vo jo kitabon men mila karte the sukhe phuul aur

mahke hue ruqe

kitaben mangne girne uthane ke bahane rishte bante the

un ka kya hoga

vo shayad ab nahin honge!

More Poems

Leave a Comment