jo baat hai teri so nirali
ushshaq-kushi na.i nikali
tir-e-mizhgan bhi hai us par
abru ki tegh bhi sambhali
samjhe hai zahiran vo dil ki
deta hai jo dar-javab gaali
naḳhun-zan hain badal ye angusht
ye sirf nahin hina ki laali
hain roz-e-azal se ham giraftar
dekhi na kabhu faragh-bali
tu to hai hi pa main bhi pyare
huun be-parva.i la-ubali
kis tarah dikha.un aah tujh ko
main apni ye ḳharab-hali
ham hain bande dani o asfal
aur aap ka hai mizaj aali
a.ina-e-dil men mahv ho kar
surat hi kuchh aur ab nikali
hai tujh se hi ashiqon ki ḳhubi
ya hazrat-e-‘dard’ mere vaali
divan-e-‘asar’ tamam dekha
hai us men har ek sher aali
Leave a Reply