ye dosti ye mohabbat ye inkisar fareb
ye ham-nava ye muavin ye mere yaar fareb
qadam qadam pe ta.alluq qadam qadam rishte
ye baar baar dilase ye baar baar fareb
naqab itne hain chehron pe kya haTaoge
har ek baar haTao har ek baar fareb
ajiib rang-e-vafa hai ajiib tarz-e-sitam
na dil-pazir mohabbat na shandar fareb
ḳhalish jigar men hai aur tajziya hai ankhon ka
baḌe saliqe se dete hain gham-gusar fareb
miri hayat mire roz-o-shab miri duniya
ye iḳhtiyar numa.ish ye e’tibar fareb
Leave a Reply