main kya bata.un tujh ko miri jaan rah ga.e
ye nabz tham ga.i magar arman rah ga.e
is mausam-e-fasurda nigahi ke hi sabab
phulon ke muntazir mire gul-dan rah ga.e
chashm-e-ghazal dasht-e-tamanna ko dekh kar
dida-vran-e-shahar bhi hairan rah ga.e
aisi hava-e-vahshat-e-avargan chali
shahzadiyon ke jhiil pe saman rah ga.e
mujh se gila fuzul hai jab ḳhud hi aap ko
ahd-e-vafa na yaad na paiman rah ga.e
ham surḳh honT vaali zuleḳha ke ishq men
kafir hi ho sake na musalman rah ga.e
Leave a Reply