kaam itna mere pyare charḳh-e-kuhan se nikle
tum se na huun juda main jab jaan tan se nikle
tum halat-e-naza.a men bhi paas mere rahna
ta kalima-e-mohammad mere dahan se nikle
yarab na ta-qayamat muhtaj huun kisi ka
jo ho miri tamanna vo panj-tan se nikle
vahshat na qabr men ho tum samne hi rahna
dast-e-junun na mera bahar kafan se nikle
hai lutf zindagi ka ba.ad-az-fana usi men
nam-e-ḳhuda jo apne sab tan-badan se nikle
roza namaz tasbih pahuncha.enge na vaan tak
hoga visal usi ko jo ma-o-man se nikle
apni ḳhabar na baaqi rah ja.egi kisi ko
parde se gar kahin vo ik bankpan se nikle
yad-e-qad-e-sanam men main duun misal us vaqt
jab kaam koi mera sarv-e-chaman se nikle
‘mardan’ jo koi Duube dariya-e-ishq men vo
chhoTe ḳhudi se apne hubb-e-vatan se nikle
Leave a Reply