jhuka sake na mujhe hadse mohabbat ke
vahi huun main to vahi silsile mohabbat ke
ye aur baat ki tum hi ne imtihan na liya
sabaq to yaad the saare mujhe mohabbat ke
talash kar unhen ahram-e-misr ki surat
hain dasht-e-dil men ka.i maqbare mohabbat ke
bata.un main tujhe anjam-e-arzu kaise
bana raha huun abhi za.iche mohabbat ke
hava ye kaisi chali hai sar-e-dayar-e-vafa
bujhe bujhe hain dilon men diye mohabbat ke
na jaane kaise marahil hain us jagah darpesh
ruke hue hain jahan qafile mohabbat ke
rah-e-vafa men qadam dekh bhaal kar rakhna
kuchh itne sahl nahin raste mohabbat ke
kashakash-e-ghame-duniya se kis ko fursat hai
karun main kis se yahan mashvare mohabbat ke
zara sa bhi mujhe ḳhauf-e-ḳhizan nahin ‘shahid’
mahak rahe hain abhi gul-kade mohabbat ke
Leave a Reply