Shahid Meer
ik sabz rang baagh dikhaya gaya mujhe
phir ḳhushk raston pe chalaya gaya mujhe
tai ho chuke the aḳhiri sanson ke marhale
jab muzhda-e-hayat sunaya gaya mujhe
pahle to chhin li miri ankhon ki raushni
phir aa.ine ke samne laaya gaya mujhe
rakkhe the us ne saare switch apne haath men
be-vaqt hi jalaya bujhaya gaya mujhe
charon taraf bichhi hain andheron ki chadaren
shayad abhi fuzul jagaya gaya mujhe
nikle hue the DhunDne ḳhun-ḳhvar janvar
kanTon ki jhaḌiyon men chhupaya gaya mujhe
ik lamha muskurane ki qimat na puchhiye
be-iḳhtiyar pahle rulaya gaya mujhe
Leave a Reply