pi kar sharab shaiḳh ne bhaunchal kar diya
hazrat ka mughbachon ne jo phir haal kar diya
sabr-o-qarar jah-o-hasham din-o-jan-o-dil
yaksar ḳhiram-e-naz ne pamal kar diya
zulm-o-sitam hua javan-mardi to na hui
pal men sip.har-e-pir ne jo zaal kar diya
miTTi nigal ga.i naujavanon ki hastiyan
gardun ne naunihal ko pamal kar diya
roTi uchak li main ne ba-unvan-e-muflisi
ghurbat ne meri mujh ko bad-a.amal kar diya
nukta-sara the kya hua ‘havi’ miyan tumhen
sher-o-suḳhan ko vaqf-e-ḳhat-o-ḳhal kar diya
Leave a Reply