sanam ke ḳhayalon men yuun kho gaya huun
ki main ek patthar ka but ho gaya huun
nahin dho saka daagh jo ganga-jal bhi
use apne ashkon se main dho gaya huun
baja.e shajar ugte hain sirf patthar
main zarḳhez dharti men kya bo gaya huun
nahin aanch aa.egi apni ana par
bulaya tha us ne tabhi to gaya huun
karoge mujhe dafn to yuun lagega
ki main maan ki godi men hi so gaya huun
vaz.a-dari ka paas tha jo chaman men
main kaliyon ka sar chumne ko gaya huun
mujhe faḳhr hai ‘panchhi’ bazm-e-suḳhan men
gaya huun ba-surat ghazal-go gaya huun
Leave a Reply