khol di hai zulf kis ne phuul se rukhsar par
chha gai kaali ghata si aan kar gulzar par
kya hi afshan hai jabin o abru-e-khamdar par
hai charaghan aaj kaabe ke dar o divar par
naqsh-e-pa panch-shakha qabar par raushan karo
mar gaya huun main tumhari garmi-e-raftar par
chashm-e-bad duur aaj hai ye kaun gul-ru jhankta
chashm-e-nargis ka hai aalam rauzan-e-divar par
na-tavan ka bhala kis munh se main shikva karun
khaal hai yaan mahr khamosh lab-e-guftar par
ham azal se intizar-e-yar men soe nahin
afrin kahiye hamare dida-e-bedar par
kufr apna ain din-dari hai gar samjhe koi
ijtima-e-subha yaan mauquf hai zunnar par
thokaren khaega ik din sar-kashi itni na kar
o sar-e-be-maghz kyuun bhula hai is dastar par
zulf us ki apne haq men dekhiye kahti hi kya
hai hamara faisla ab to zaban-e-mar par
gar chaman men ham se be-bargon ko ja deti nahin
khaar ki manind bithla den sar-e-divar par
hai agar irfan ka talib khaksari kar shiar
dekhte hain aaine aksar laga divar par
abru-o-mizhgan se us ke dekhen dil kyunkar bache
ab to naubat aa gai hai tiir aur talvar par
intiha-e-ishq men di jaan main ne is liye
laala ba-sad daagh ugta hai mire kohsar par
rabta gar ghair se ho yaar ko chahun main
main na bulbul huun ki marta huun gul-e-be-e-khar par
dil jala aisa huun mera naam le baitha jo vo
pad gae chhale zaban-e-murgh-e-atish-e-khvar par
uth ke but-khane se masjid ko agar jaega tu
saikdon tutengi tasbihen tire zunnar par
haif ku-e-yar tak pahunchi na meri ustukhan
muddaton aa kar huma baitha raha divar par
suukh jaaen gar hamari ablon ki chhagalen
paas se kante nazar aaen zaban-e-khar par
baad murdan bhi hai baaqi meri nalon ka asar
tar-e-mutrib ka hai aalam har kafan ki taar par
teri ab-e-tegh se zalim jo ho tufan bapa
maut tadpi misl-e-mahi gumbad-e-davvar par
khat use itne likhe main ne ki vaan bhar javab
baithe rahte hain kabutar saikdon divar par
hashr tak mumkin nahin ab chamki tegh-e-aftab
baada rakhvata hai zalim maghribi talvar par
kafsh-e-pa ki gul dikha kar hans ke yuun kahne laga
sair ko kyuun jaun gulshan hai mire bezar par
dekhiyo zid mere murgh-e-nama-bar ke vaste
qainchiyan lagvain hain be-rahm ne divar par
yaar ko maalum hota hai hijr men soya nahin
khat likhun goya bayaz-e-dida-e-bedar par
Leave a Reply