dil jo siine men zaar sa hai kuchh
gham se be-ikhtiyar sa hai kuchh
rakht-e-hasti badan pe thiik nahin
jama-e-mustaar sa hai kuchh
chashm-e-nargis kahan vo chashm kahan
nashsha kaisa khumar sa hai kuchh
nakhl-e-ummid men na phuul na phal
shajar-e-be-bahar sa hai kuchh
saqiya hijr men ye abr nahin
asman par ghubar sa hai kuchh
kal to aafat thi dil ki betabi
aaj bhi be-qarar sa hai kuchh
murda hai dil to gor hai siina
daagh sham-e-mazar sa hai kuchh
is ko duniya ki us ko khuld ki hirs
rind hai kuchh na parsa hai kuchh
pahle is se tha hoshiyar ‘amir’
ab to be-ikhtiyar sa hai kuchh
Leave a Reply