kabhi taskin kabhi azar bhi hai
mohabbat phuul bhi hai ḳhaar bhi hai
pighal jaati hai misl-e-sham.a lekin
mohabbat ahani divar bhi hai
tire honTon pe hai inkar lekin
tiri ankhon men kuchh iqrar bhi hai
ba-zahir hain sabhi gham-ḳhvar lekin
haqiqat men koi gham-ḳhvar bhi hai
kabhi un ki nazar hai vaj.h-e-taskin
kabhi chalti hui talvar bhi hai
na ja is par ki main chup huun sitam par
ye ḳhamoshi lab-e-guftar bhi hai
zamana tanz-farma bhi hai lekin
ulajhna ishq se be-kar bhi hai
faqat guftar par nazan hai ‘asi’
ḳhayal-e-ḳhubi-e-kirdar bhi hai
Leave a Reply