Atif Khan
vo baat jis se ye Dar tha khuli to jaan legi
so ab ye dekhiye ja ke vo dam kahan legi
milegi jalne se fursat hamen to sochenge
panah raakh hamari kahan kahan legi
ye aag jis ne jala.e hain shahron jangal sab
kabhi bujhegi to ye surat-e-ḳhizan legi
ye din jo tha ye raha hain gavah va.adon ka
ye shab jo hai tire da.avon ka imtihan legi
utar ga.i hai mire jism men jo ye vahshat
nikalte vaqt yahi umr-e-javedan legi
zara si ḳhaak lahu de ke mutma.in hain kyuun
abhi to rah-e-safar rahravon ki jaan legi
vasi.a itni hai uryaniyat ye jaan ki dekh
badan ke dhakne ko ye kitne asman legi
burida sar kiye ja.enge sab javan kirdar
vo chehra dekhna ‘atif’ ye dastan legi
Leave a Reply