Tez Aandhi Ne Faqat Ek Saeban Rahne Diya

Shafiq Saleemi

tez andhi ne faqat ik sa.eban rahne diya

ham zamin-zadon ke sar par asman rahne diya

lafz vo barte ki saari baat mub.ham ho ga.i

ik parda tha ki haa.el darmiyan rahne diya

aankh basti ne sabhi mausam musafir kar diye

ek ashkon ki ravani ka saman rahne diya

ḳhuun ki surḳhi andheron men ujala ban ga.i

ham ne har surat charaghon ko javan rahne diya

sad-kamal-e-mehrbani paniyon ne is daf.a

kaghzi kashti ko lahron par ravan rahne diya

laakh koshish par bhi ghar ko ghar na kar paa.e ‘shafiq’

aur phir ham ne makan ko bas makan rahne diya