Rashid Taraz
raushni ban ke andhere pe asar ham ne kiya
dasht-e-tanha.i se kya ḳhuub guzar ham ne kiya
bandish-e-hijr ko toḌa nahin tu ne aa kar
yaad kya tujh ko nahin shaam o sahar ham ne kiya
ik bayaban bhi mila muntazir-e-nur-e-azal
dil ki virani ko jab pesh-e-nazar ham ne kiya
aur kuchh ho na saka surat-e-darman lekin
apna daman to sar-e-dida-e-tar ham ne kiya
dard ke maare hue log the ḳhvabon ke qarib
kaise nadida zamanon ka safar ham ne kiya
ham ne dekha hai vahan phir bhi ujala ‘rashid’
saath rahte hue sab ke jahan ghar ham ne kiya
Leave a Reply