Mahbub-E-Nazar Aap Ke Chehre Ki Ziya Hai

mahbūb-e-nazar aap ke chehre kī ziyā hai

matlūb-e-jabīñ aap kā naqsh-e-kaf-e-pā hai

ham ne tire jalve kā jise aks kahā hai

logoñ ne use phuul kā unvān diyā hai

hañste hue tāroñ kā galā ghoñT diyā hai

sūraj kī shuāoñ ne baḌā zulm kiyā hai

martā hai to mar jaa.e koī merī balā se

mujh ko mire māhaul ne ye dars diyā hai

āñkhoñ meñ haiñ aañsū ki añdherā hai pur-afshāñ

jis chehre ko dekhā vahī dhuñdlā sā lagā hai

Leave a Comment