Is Wusat-E-Kalam Se Ji Tang Aa Gaya

is vusat-e-kalam se ji tang aa gaya

naseh tu meri jaan na le dil gaya gaya

zid se vo phir raqib ke ghar men chala gaya

ai rashk meri jaan gai tera kya gaya

ye zof hai to dam se bhi kab tak chala gaya

khud-raftagi ke sadme se mujh ko ghash aa gaya

kya puchhta hai talkhi-e-ulfat men pand ko

aisi to lazzaten hain ki tu jaan kha gaya

kuchh aankh band hote hi ankhen si khul gaiin

ji ik bala-e-jan tha achchha hua gaya

ankhen jo DhunDti thiin nigah-ha-e-iltifat

gum hona dil ka vo miri nazron se pa gaya

bu-e-saman se shaad the aghyar-e-be-tamiz

us gul ko e’tibar-e-nasim-o-saba gaya

ah-e-sahar hamari falak se phiri na ho

kaisi hava chali ye ki ji sansana gaya

aati nahin bala-e-shab-e-gham nigah men

kis mehr-vash ka jalva nazar men sama gaya

ai jazb-e-dil na tham ki na thahra vo shola-ru

aaya to garm garm va-lekin jala gaya

mujh khanuman-kharab ka likkha ki jaan kar

vo naama ghair ka mire ghar men gira gaya

mehndi malega paanv se dushman to aan kar

kyuun mere tafta siine ko thokar laga gaya

bosa sanam ki aankh ka lete hi jaan di

‘momin’ ko yaad kya hajrul-asvad aa gaya

Leave a Comment