Munawwar Rana
dohra raha huun baat purani kahi hui
tasvir tere ghar men thi meri lagi hui
in bad-nasib ankhon ne dekhi hai baar baar
divar men gharib ki khvahish chuni hui
taaza ghazal zaruri hai mahfil ke vaste
sunta nahin hai koi dobara suni hui
muddat se koi dusra rahta hai ham nahin
darvaze par hamari hai takhti lagi hui
jab tak hai dor haath men tab tak ka khel hai
dekhi to hongi tum ne patangen kati hui
jis ki judai ne mujhe shair bana diya
padhta huun main ghazal bhi usi ki likhi hui
lagta hai jaise ghar men nahin huun main qaid huun
milti hain rotiyan bhi jahan par gini hui
sanson ke aane jaane pe chalta hai karobar
chhuta nahin hai koi bhi handi jali hui
ye zakhm ka nishan hai jaega der se
chhutti nahin hai jaldi se mehndi lagi hui
Leave a Reply