Kis Ka Hai Jurm Kis Ki Khata Sochna Pada

Abrar Azmi

kis ka hai jurm kis ki khata sochna pada

rahte hain kyuun vo ham se khafa sochna pada

gul ki hansi men raqs-e-nujum-o-qamar men bhi

shamil hai kitni teri ada sochna pada

jab bhi miri vafaon ki baat aa gai kahin

un ko phir ek uzr-e-jafa sochna pada

ghunche udaas gul hain fasurda chaman chaman

kis ka karam hai bad-e-saba sochna pada

shayad tumhari yaad mire paas aa gai

ya hai mire hi dil ki sada sochna pada

jab bhi koi bhatak ke sar-e-rah aa gaya

kitni kathin hai rah-e-vafa sochna pada

zindan ki baat daar ke charche rasan ka zikr

kitni ajab hai tab-e-rasa sochna pada