Dard-E-Furqat Ko Kya Kare Koi

Safi Aurangabadi

dard-e-furqat ko kya kare koi

haa.e aadat ko kya kare koi

dil ki hasrat ko kya kare koi

is musibat ko kya kare koi

pyaar karne se aar hai to kaho

achchhi surat ko kya kare koi

doston ko to rokun shoḳhi se

saari ḳhilqat ko kya kare koi

chashm-o-dil se chhupa.un dard-e-nihan

rang-e-surat ko kya kare koi

apne dil ka to ḳhuun kar Dalun

un ki surat ko kya kare koi

un ka farman hai ki ah-o-fughan

ma-badaulat ko kya kare koi

nasehon ko salam bhi kar luun

us nasihat ko kya kare koi

aarzu hai to ḳhauf bhi kuchh hai

paak niyyat ko kya kare koi

tujh men jo baat chahiye vo nahin

le ke surat ko kya kare koi

vo ḳhafa hon to main ḳhata kar luun

chheḌ hujjat ko kya kare koi

mehrban hain janab-e-dil us par

aise hazrat ko kya kare koi

meri taqrir men to hai tasir

teri sohbat ko kya kare koi

naam bhi un ka ham nahin lete

ab shararat ko kya kare koi

ai safi’ vo bigaḌ ga.e man kar

teri qismat ko kya kare koi