Mohabbat Na-Samajh Hoti Hai Samjhana Zaruri Hai

Waseem Barelvi

mohabbat na-samajh hoti hai samjhana zaruri hai

jo dil men hai use ankhon se kahlana zaruri hai

usulon par jahan aanch aae takrana zaruri hai

jo zinda ho to phir zinda nazar aana zaruri hai

nai umron ki khud-mukhtariyon ko kaun samjhae

kahan se bach ke chalna hai kahan jaana zaruri hai

thake-hare parinde jab basere ke liye lauten

saliqa-mand shakhon ka lachak jaana zaruri hai

bahut bebak ankhon men taalluq tik nahin paata

mohabbat men kashish rakhne ko sharmana zaruri hai

saliqa hi nahin shayad use mahsus karne ka

jo kahta hai khuda hai to nazar aana zaruri hai

mire honton pe apni pyaas rakh do aur phir socho

ki is ke baad bhi duniya men kuchh paana zaruri hai