Sulaiman Areeb
tumhari qaid-e-vafa se jo chhuT ja.unga
azal se le ke abad tak main TuuT ja.unga
ḳhabar nahin hai kisi ko bhi ḳhastagi ki miri
mujhe na haath lagao ki TuuT ja.unga
tumhari meri rifaqat hai chand qaumon tak
tumhare paanv ka chhala huun phuuT ja.unga
hazar naaz sahi mujh ko apni qismat par
hina-e-dast-e-nigarin huun chhuT ja.unga
tumhari bazm se uTh kar ye va.ada karta huun
jahan bhi ja.unga ab jhuT-muT ja.unga
Leave a Reply