sakin hai koi aur vatan aur kisi ka
ye ruuh kisi ki hai badan aur kisi ka
surkhi hai kaho ki mire har sarv-o-saman men
padhta hai qasida ye chaman aur kisi ka
taskin ka baais hai kisi aur ka pahlu
ehsas dilati hai chubhan aur kisi ka
aina samajhte hain tujhe sab ye alag baat
hai tujh men magar aina-pan aur kisi ka
ye pyaar ka jazba tire kuchh kaam to aae
mera nahin banta hai to ban aur kisi ka
kahte hain sukhnavar mujhe nisbat se tiri sab
rahta hai mire lab pe ‘sukhan’ aur kisi ka
Leave a Reply