chand nikla hai sar-e-qarya-e-zulmat dekho
ho gai kaisi siyah-khanon ki rangat dekho
samne jo hai use aankh ka dhoka samjho
in dayaron ko sada khvab ki surat dekho
sair hai jaise koii, aise jahan se guzro
duur tak phaila hai ik arsa-e-furqat dekho
zar ki parchhain jo padti hai chamak uthta hai
adam-e-khak ki be-hoshi men halat dekho
khauf deta hai yahan abr men tanha hona
shahr-e-dar-band men divaron ki kasrat dekho
saaya hai un pe bahut bhuli hui yadon ka
shaam aai hai pari-zadon men vahshat dekho
daagh hai is ke na hone se dilon men ab tak
ud gaya misl-e-saba gul ki haqiqat dekho
jangalon men koi pichhe se bulae to ‘munir’
mud ke raste men kabhi us ki taraf mat dekho
Leave a Reply